Día das Bibliotecas: A biblioteca Nautilus sae ao recreo

Neste día quixemos que a biblioteca saíra ao exterior, aínda que a chuvia obrigounos a quedar durante as primeiras horas da mañá no vestíbulo do centro.Os alumnos participaron nun concurso de identificación de lecturas. Agasallamos aos participantes cunhas pastas caseiras. Pero, ademais, o xurado formado polo equipo de biblioteca e o equipo de Dinamización lingüística decidiu que alumnos serían os gañadores do concurso de marcapáxinas. Entregaremos os premios, consistentes en entradas de cine. o vindeiro venres 29 de outubro. Tamén premiaremos aos participantes no concurso de Escritoras galegas.

A nosa intención foi celebrar o día grande das bibliotecas achegando a todo o alumnado e profesorado o labor que se fai no fomento da lectura, da búsqueda de información e, en definitiva, en todo aquilo que,pouco a pouco, construimos dende O Nautilus para a comunidade escolar.

Previamente, o día 19 de outubro visitamos, cos alumnos e alumnas de 3º de ESO, a Biblioteca Municipal do Castrillón, para asisitir a unha charla sobre a escritora Emilia Pardo Bazán. Esta actividade, acompañada da lectura de contos da autora por parte dos alumnos, terá continuidade cunha lectura pública nunha residencia de maiores para o mes de decembro.

Advertisement

Día das escritoras

Dende a biblioteca do IES Monelos,, en colaboración co equipo de Dinamización lingüística, queremos celebrar este día nun momento no que a sociedade reclama unha maior visibilidade da muller no eido das letras. As mulleres escritoras teñen maior acollida entre mulleres lectoras. Reivindicamos que ese público lector se incremente. Presentamos unha escolma de autoras galegas e invitamos ao noso alumnado a participar nun concurso para identificar algunhas delas a través de pistas.

Podedes recoller o cuestionario no posto da biblioteca.

Escritoras galegas actuaisDescarga

BENVIDOS A ESTE NOVO CURSO!

Abrimos as portas pechadas, as fiestras entornadas, e deixamos que a luz entre nos espazos do IES Monelos. Vimos con ilusión de emprender proxectos, de alimentarnos dos talentos de todos vós. Porque todos temos algo que nos fai brillar, aínda que non o saibamos.

Traballar en grupo é a nosa inquietude para este curso 2021-22. Construir, aportando o que cada un sabe facer. Aprendimos moito do ano anterior. Agora somos máis fortes; coñecemos as nosas debilidades e esta é a forma de vencelas.

Dende a nosa biblioteca, convertida en aula un ano máis, miramos con esperanza esta nova oportunidade de medrar. E sentir que só temos o presente para vivilo intensamente, compartindo momentos, compartindo lecturas.

Benvido curso 2021-22!