Día das escritoras

Dende a biblioteca do IES Monelos,, en colaboración co equipo de Dinamización lingüística, queremos celebrar este día nun momento no que a sociedade reclama unha maior visibilidade da muller no eido das letras. As mulleres escritoras teñen maior acollida entre mulleres lectoras. Reivindicamos que ese público lector se incremente. Presentamos unha escolma de autoras galegas e invitamos ao noso alumnado a participar nun concurso para identificar algunhas delas a través de pistas.

Podedes recoller o cuestionario no posto da biblioteca.

BENVIDOS A ESTE NOVO CURSO!

Abrimos as portas pechadas, as fiestras entornadas, e deixamos que a luz entre nos espazos do IES Monelos. Vimos con ilusión de emprender proxectos, de alimentarnos dos talentos de todos vós. Porque todos temos algo que nos fai brillar, aínda que non o saibamos.

Traballar en grupo é a nosa inquietude para este curso 2021-22. Construir, aportando o que cada un sabe facer. Aprendimos moito do ano anterior. Agora somos máis fortes; coñecemos as nosas debilidades e esta é a forma de vencelas.

Dende a nosa biblioteca, convertida en aula un ano máis, miramos con esperanza esta nova oportunidade de medrar. E sentir que só temos o presente para vivilo intensamente, compartindo momentos, compartindo lecturas.

Benvido curso 2021-22!

O xornal da Biblioteca: O Nautilus

Este derradeiro trimestre publicamos o noso xornal adicado a diferentes conmemoracións: o Día do Libro, o Centenario do pasamento de Emilia Pardo Bazán, o Día das Letras Galegas. Tamén queremos facer partícipe á comunidade escolar das creacións literarias dos nosos alumnos, as súas opinións sobre temas de actualidade e o interese que despertan os Clubs de Lectura.

O noso desexo é que o vindeiro ano sigamos a publicar este xornal, nun espazo de normalidade, no que a Biblioteca recupere o protagonismo que tivo antes da pandemia.

Día do Libro: Literatura na rede

Os alumnos do IES Monelos participaron nesta data tan especial deixando, nunha rede non virtual, pequenos fragmentos de obras literarias que lles emocionaban especialmente. Eses anacos de vida quedaron retidos nos ollos daqueles que se achegaban a ler como, do mesmo xeito, todos os que amamos a literatura quedamos atrapados na rede de beleza creada coas palabras.

Día da Poesía no IES Monelos

A pandemia convertiu a nosa biblioteca nun espazo diferente. Hoxe o alumnado escoita aos profesores rodeado de libros, de palabras que están agardando ser pronunciadas, agochadas nos andeis, atentas elas tamén á voz dos docentes. Abrimos as xanelas para que o virus fuxa de nós e o ar se encha de versos como os que estes rapaces deixan nos beizos… para que ti os recollas.

Recomendacións lectoras para un Nadal diferente

Neste Nadal, máis ca nunca, faise necesario retornar á nosa intimidade, ó calor do fogar, ás emocións sosegadas, aquelas que non rompen o silencio.

Porque desexamos erguernos renovados dunha experiencia de dor e sinsentido, porque un ano mellor nos agarda, sentimos unha forza que nos chama a mirar ó futuro cos ollos sorprendidos dun neno, ese neno que lía historias máxicas e que todos levamos dentro.

RECOMENDACIÓNS LECTORAS PARA NADAL 2020

Christmas Reading

Formulario petición libros da biblioteca

Despois dun inicio de curso cheo de incertezas, dende a biblioteca do IES Monelos seguimos a pensar na comunidade escolar. Iniciamos o camiño, neste ano académico 2020-21, con novos proxectos en mente e un novo xeito de reservar as peticións dos nosos lectores. Aquí tedes esta ligazón: https://forms.gle/ZCxxHX69YLaiAWnT6

Para poder acceder ao formulario de solicitude de préstamo necesitades previamente iniciar sesión na conta de G-SUITE no equipo informático no que levedes a cabo a devandita solicitude. De tódolos xeitos, se tedes algún problema contactade co equipo de Biblioteca.

As vosas peticións serán atendidas en canto cubrades os datos do formulario que se despregará ao premer na ligazón . Os alumnos poderán facer uso dos libros durante 15 días, ao remate dos cales, deberán devolvelos en perfecto estado.

Desexamos un ano cheo de ilusións por aprender e disfrutar das lecturas!

Mirando con outros ollos: lecturas de verán

Alumnado do IES Monelos recomenda  lecturas para os días dun verán diferente. Pedímoslles que acompañaran a súa recomendación da fotografía dunha paisaxe coruñesa que perdimos durante o confinamento. Porque todos perdimos algo naquel tempo pero  gañamos unha nova mirada. Mirar de novo, dentro e fóra, a través da lectura que conforma os nosos sentidos para descubrir a realidade.

Felices vacacións!

Recomendacións de verán 2020

Día do libro no Nautilus do IES Monelos

Sae o noso novo número do xornal O Nautilus con motivo dunha celebración moi especial: o Día do libro. Nesta edición atoparedes recomendacións lectoras, o labor desenvovido nos Clubs de lectura, a nosa reflexión sobre este día tan importante, a creación literaria dos nosos alumnos e unha lembranza a Luz Pozo Garza que nos deixou máis sós o día 20 do mes de abril.

Desexamos a todos que, máis que nunca nestes momentos, os libros sexan eses compañeiros silenciosos que abren unha fiestra á esperanza.

O Nautilus-num2