Visita do alumnado de 2º de ESO á Residencia Torrente Ballester

O pasado día 19 de decembro, o alumnado de 2º de ESO do noso instituto acudiu á Residencia de Maiores Torrente Ballester para ler aos residentes textos poéticos de Rosalía de Castro e, en prosa, de Xosé Neira Vilas e Castelao. Acompañaron aos rapaces a coordinadora da biblioteca do IES Monelos, que organizou a visita xunto con Alicia Pérez, bibliotecaria da Biblioteca Municipal do Castrillón. A lectura foi seguida de música a cargo de tres intérpretes que acudiron con Alicia Pérez.

Ao remate, os alumnos entregaron aos maiores postais de Nadal elaboradas por todos os grupos de 2º de ESO. Quixemos levar un anaquiño de ilusións aos nosos avós e avoas nestas datas tan especiais. A experiencia foi marabillosa e inesquecible. Os rapaces falaron cos residentes e fixéronse fotos con eles.

Advertisement

Día das Bibliotecas no IES Monelos

Para conmemorar este día, o equipo de Biblioteca organizou unha visita do alumnado de 1º de ESO á Biblioteca Municipal do Castrillón. Alí coñeceron os diferentes espazos, as recomendacións lectoras das bibliotecarias e puideron curiosear entre os andeis. Foi unha xornada de formación e lecer na que a rapazada participou facendo suxestións e preguntando dúbidas.

Ao mesmo tempo, proxectamos no vestíbulo do centro un power point sobre a vida e obra de María Casares, pois o 21 de novembro cúmprense 100 anos do seu nacemento. Ademais, un grupo de alumnos de 2º de ESO prepararon un coloquio sobre a actriz galega, documentándose previamente mediante uns cadernos didácticos cedidos polo Concello da nosa cidade e que foron traballados na aula coa coordinadora da Biblioteca. Os alumnos gravarán un podcast na radio do centro o vindeiro mércores día 2 de novembro.

Divertirse aprendendo este verán

A nosa proposta de lectura vai encamiñada a descubrir as infinitas posibilidades do coñecemento divulgativo. Para todas as idades temos á vosa disposición un conxunto de obras que vos achegarán ao mundo da cultura, da investigación, das emocións, dun xeito ameno, engaiolante. Este verán ofertamos espazos de saber para un tempo de lecer.

Lectura de relatos na Residencia Torrente Ballester

O luns, día 9, acudimos á Residencia Torrente Ballester con alumnos de 3º de ESO para ler aos nosos maiores relatos de Emilia Pardo Bazán. Acompañounos Alicia, bibliotecaria da Biblioteca Municipal do Castrillón, que organizou con nós esta actividade. Foi un encontro moi gratificante. A acollida foi entrañable.Os nosos alumnos transmitiron ao público todo o seu entusiasmo, un sopro de aire fresco despois da difícil situación que viviron nas residencias de maoires pola Covid-19. Quedamos en voltar noutras ocasións e representar obras teatrais protagonizadas polos rapaces do noso centro, e a bilbiotecaria do Castrillón comprometeuse a levar maletas con libros para todos os residentes.

Día do Libro no IES Monelos

Este ano aproveitamos esta festividade para organizar unha venda de libros usados que cederon os profesores do noso centro. Encargáronse de xestionalo as nosas voluntarias da biblioteca. Foi todo un éxito! Agardamos en vindeiros anos ofertar lecturas que motiven ao noso alumnado, con variedade de títulos aptos para todas as idades.

DÍa da poesía: lembrando a Miguel Hernández

Este ano, e neste mes, cúmprense 80 anos do pasamento, no cárcere de Alicante, de Miguel Hernández, un poeta que se definiu a si mesmo como barro, elemental e humano. Os seus versos teñen a forza da auga que baixa a torrentes pola ladeiras, do lóstrego que parte en dous o ceo e nos deslumbra, da ferramenta que fai nacer o suco na terra. Por esta razón, o IES Monelos quere rendir homenaxe á voz deste poeta cunha lembranza dalgúns momentos da súa vida e obra e ademais, co contacto cun centro de ensino secundario de Orihuela, terra natal do autor. O noso alumnado está a traballar cos poemas de Miguel Hernández, con ilustracións, reinterpretacións, caligramas… O resultado desta experiencia será un intercambio de traballos e cartas cos rapaces do centro de Orihuela.

Agardamos que esta iniciativa, apoiada pola Biblioteca municipal do Castrillón, axude a achegar a poesía de Miguel Hernández á nosa rapazada e a darlle protagonismo á lírica como palabra esencial e verdadeira.

Día de Rosalía no IES Monelos

Alumnado de Primeiro ciclo de ESO colaborou na celebración do Día de Rosalía presentando carteis alusivos á súa vida e obra e lendo fragmentos de poemas da autora que recollimos neste vídeo.

Ademais a rapazada e o profesorado quixeron fotografiarse con esta imaxe da escritora galega que ofrecimos á comunidade escolar en homenaxe a Rosalía. Esta é a nosa Rosalía: preto de todos nós.

Hora de ler

A semana pasada o alumnado de 2º de ESO, acompañado da súa profesora, aproveitou o sol e as boas temperaturas para trasladar a Hora de ler a outro espazo: os xardíns do barrio de Monelos. De xeito informal, a lectura integrouse na natureza e os personaxes de ficción saíron á rúa coa rapazada.

Esta iniciativa paréceunos tan ilusionante que tentaremos repetila se o tempo axuda. Aquí vai unha escolma de imaxes deste momento de lecer onde a imaxinación e a realidade camiñan da man.